वीरगञ्ज – भारत सरकारले नेपाल सरकारलाई १० वटा कैदी वाहन हस्तान्तरण गरेको छ। वीरगञ्जस्थित भारतको महावाणिज्य दूतावासमा आयोजित एक समारोहमा भारतका महावाणिज्यदूत श्री देवी सहाई मीणाले पर्साका प्रमुख जिल्ला अधिकारी श्री भोला दाहाललाई प्रतीकात्मक रूपमा सवारी साधनको साँचो हस्तान्तरण गरेका हुन्।
महावाणिज्य दूतावासका अनुसार यी वाहनहरूले नेपालका सुरक्षा निकाय र कानुन कार्यान्वयन निकायहरूको क्षमता अभिवृद्धि गर्न सहयोग पुर्याउनेछन्।
कार्यक्रममा बोल्दै अधिकारीहरूले भारत–नेपालबीचको “सीमा नाघेको मैत्री” लाई जोड दिँदै यस्तो सहयोगले दुई देशको सहकार्यलाई थप सुदृढ बनाउने बताएका छन्।
भारत सरकारले यसअघि पनि नेपाललाई सुरक्षा क्षेत्रमा सहयोग गर्दै आएको छ। यसै वर्ष मात्रै २०२६ मार्च ५ मा सम्पन्न प्रतिनिधिसभा निर्वाचनका लागि भारतले करिब ६४० वटा एसयूभी, पिकअप र ट्रक हस्तान्तरण गरेको थियो। त्यस्तै, विगतका वर्षहरूमा नेपाल प्रहरी, सशस्त्र प्रहरी बल र नेपाली सेना लगायतका सुरक्षा निकायलाई २ हजारभन्दा बढी सवारी साधन भारतले उपहारस्वरूप प्रदान गरेको छ।
