अरविंद कुमार, मोतिहारी — भारतको बिहार राज्य, पूर्वी चम्पारण जिल्लाको घोडासहन थाना क्षेत्रमा ६० फिट अग्लो मोबाइल टावरबाट झुन्डिएको अवस्थामा एक नेपाली युवकको शव फेला परेको छ।
मृतकको पहिचान घोडासहन बजारको वीरता चौकमा भाडाको घरमा बस्दै आएका हैदर मियाँको रूपमा भएको छ। उनी मूल रूपमा नेपालका बासिन्दा हुन् र मजदुरीका लागि केही वर्षदेखि परिवारसहित घोडासहनमा बस्दै आएका थिए।
स्थानीयका अनुसार हैदर केही दिनदेखि मानसिक तनावमा थिए। उनी मंगलबार बिहान करिब ३ बजे घरबाट निस्केका थिए। बिहान उज्यालो भएपछि स्थानीयले वीरता चौकस्थित मोबाइल टावरमा शव झुन्डिएको देखेपछि क्षेत्रमा त्रास फैलिएको थियो।
घटनाको सूचना पाएलगत्तै घोडासहन प्रहरी घटनास्थलमा पुगेर शव तल झारेको थियो। शवलाई पोस्टमार्टमका लागि मोतिहारीस्थित सदर अस्पताल पठाइएको छ। प्रहरीले घटनाको कारणबारे अनुसन्धान सुरु गरेको जनाएको छ।
परिवार र स्थानीयसँग सोधपुछ भइरहेको प्रहरीले जनाएको छ। प्रारम्भिक अनुसन्धानमा आत्महत्याको आशंका गरिएको भए पनि पोस्टमार्टम रिपोर्टपछि मात्रै थप कुरा खुल्ने बताइएको छ।
