उज्यालो नेपाल पार्टीका तर्फबाट पर्सा निर्वाचन क्षेत्र नम्बर १ का प्रतिनिधि सभा सदस्य उम्मेदवार रामकिशोर सिंह (पराग)द्वारा आज वीरगञ्ज महानगरपालिका वडा नम्बर २३ अन्तर्गत प्रसौनी र सबैठवा गाउँमा रात्रिकालीन घरदैलो कार्यक्रम सम्पन्न गरिएको छ।
कार्यक्रमका क्रममा स्थानीयवासीहरूले फूलमाला तथा खादा लगाई उम्मेदवार सिंहलाई भव्य स्वागत तथा सम्मान व्यक्त गरेका थिए। कार्यक्रममा स्थानीय बासिन्दा तथा युवाहरूको उत्साहजनक सहभागिता रहेको थियो।
भेटघाटका क्रममा स्थानीयवासी तथा युवाहरूले विगतका पार्टी तथा उम्मेदवारहरूले चुनावका बेला आश्वासन मात्र दिने तर विकास र रोजगारी सिर्जनामा कुनै ठोस काम नगरेको भन्दै असन्तुष्टि व्यक्त गरेका थिए। चुनाव नजिकिँदा युवाहरूलाई प्रयोग गर्ने, रोजगारीको सपना देखाउने तर जितेपछि जनतासँग सम्पर्कविहीन हुने नेताहरूलाई अब बहिष्कार गर्ने र सक्षम तथा नयाँ उम्मेदवारलाई आगामी निर्वाचनमा साथ दिने प्रतिबद्धता स्थानीयहरूले जनाएका थिए।
स्थानीयहरूले उज्यालो नेपाल पार्टीका अध्यक्ष कुलमान घिसिङलाई काम गर्ने नेतृत्वको रूपमा प्रशंसा गर्दै उम्मेदवार सिंहप्रति समर्थन व्यक्त गरेका थिए।
उम्मेदवार सिंहले स्थानीयवासीहरूको समस्या आफू निर्वाचित भएलगत्तै समाधान गर्ने प्रतिबद्धता व्यक्त गर्दै गाउँ–गाउँमा शिक्षा, स्वास्थ्य तथा रोजगारीलाई प्राथमिकतामा राख्ने बताउनुभयो। साथै, निर्वाचित भएपछि स्थानीय स्तरमै कलकारखाना स्थापना गरी योग्य तथा सक्षम व्यक्तिहरूलाई रोजगारी प्रदान गर्ने योजना रहेको जानकारी दिनुभयो।
वीरगञ्ज महानगरपालिका वडा नम्बर २० मा निर्वाचित भई हासिल गरेको अनुभवलाई संघीय संसदसम्म पुर्याई क्षेत्रको समग्र विकासका लागि प्रभावकारी आवाज उठाउने प्रतिबद्धता समेत उहाँले व्यक्त गर्नुभयो।
कार्यक्रमको अन्त्यमा स्थानीयवासीहरूले उम्मेदवार सिंहलाई विजयको अग्रिम शुभकामना व्यक्त गर्दै आगामी निर्वाचनमा पूर्ण समर्थन रहने विश्वास व्यक्त गरेका थिए।
